Tuesday, December 26, 2006
الحلوه
حكايات...حكايات
حب و كره..صبح و ليل
بابا يقلى تعالى يا حلوه
نحكى حكايه جديده جميله
اضحك و اجرى و كلى حنين
هوه سريرى هوه المسرح
عشنا عليه ايام و ليالى
يحكى الاب كان يما كان
تلاقى البنت فى الف مكان
يوم فرعونى و يوم فى الغابه
وسط قصور و جسور و ديابه
يجى الفارس المغوار
اللى ما عمره حب الا عنيها
اللى بيحلم ان حياته تكون حواليها
يجى يحارب الف مدينه
يجى يحرر قلب اميره
يجى يقولها انى بحبك
انتى اميرتى و انتى حياتى
عينى تغفل ..يسرقنى النوم
احلم انى هناك
وسط قصور و جسور و ديابه
يجى الفارس المغوار
يقلى بحبك
و عشانك ههدم الاسوار
حدوته جميله و حلم جميل
يخدنا العمر يوم ورا يوم
يقلولى كبرتى يا حلوه و صرتى عروسه
بكره جى يا حلوه هو
بكره جى عشان يشوفك
بكره تقعدوا ويا بعض
لجل ما تتجوزوا
لجل بيتكم و عيالكم
لجل عيشه هنيه حلوه
يجى بكره
اشوفه عبد ما هو فارس
عبد لقرش و دينار
حد كل حياته فاضيه مغبره
حد عايز لقمه حلوه و ست لتربى العيال
كيف يكون هو فارس
كيف اكون انا الاميره
اجرى على بابا اقله
الحقنى يا بابا خلاص
قرروا بيعى فى مزاد
قرروا يتفقوا على عفش و جهاز
يقلى بابا و فيها ايه
كبرتى يا حلوه خلاص
و لا ايه؟
حرام عليكم كلكم
اذا كنتوا ناوين على النهايه من البدايه
ليه حكيتوا لينا الحكايه
ليه زرعتوا فى قلوب البنات الفوارس
ليه حكيتوا قصص العاشقين
ليه ما قلتوا الحقيقه
ان فى مزاد يباعوا
ان فرسانهم عبيد
ان خيالتهم حرام
ليه ضحكتوا علينا ليه
عدى عمر البنت عدى
كبرت البنت خلاص
جم فى يوم يسألوها
فين يا حلوه انتى فين؟؟
المكان هو هو
هو ده البحر القديم
فكره حبك ليه فى يوم
فكره جريك بين اديه
فكره ضحكه كات تلالى
فكره حبك للنجوم
فكره فكره و لا نسيتى خلاص؟؟
تبتسم الحلوه ليهم
ابتسامه عدمها احسن
تقلهم بعت دماغى من زمن
و اشتريت دماغ جديده
موديل جديد
فيها زر جميل صغير
زر يمسح الشريط
شريط حياتنا و ذكريتنا
حتى نقدر يوم نعيش
كبرت الحلوه خلاص
قالولها ماما
قعدت الحلوه معاهم فى سريرهم
تحكى ليهم الحكايه
هى هى
تلتمع عين الصغيره بالامانى
تقلها الحلوه بكره قرب
بكره تبقى فى يوم كبيره
بكره يجوا يسلبوكى حتى حلمك
بكره يكتر بياعينك
تنطفى عين الصغيره
يترسم فعنيها خوف
لا يا بنتى
دارى خوفك
بياعينك موجودين
و الفارس هناك اهوا
اختيارك بين اديكى يا حلوه صار
بين حصان و عربيه
ليكى وحدك الاختيار
إتفضل الورقه و القلم
---------------------------------------
Name::big big girl...in a big big world
