قلبى ده طفل صغير
إياك تزعل منه
لو يوم فيه تتحير
سامح و أعرف إنه
طفل صغير و بيتغير طبعا غصب عنه
غصب عنه إكمنه ..طفل صغير قلبى
طفل يحير أنا مش فاهمه و منيش عارفه كمان
له أوقات و سعات يتشاقى يسرح و را أوهام
يهرب منك يبعد عنك يعند فى الأيام من غير أى كلام من غير حتى خصام
أجمل شىء إنه بيرجعلك و يرجع الأيام و يفضفضلك و يعوضلك
قد البعد هيام قد الهجر غرام
و يعودلك ندمان مليان شوق و حنان و براءه و توهان
أنا لو منك أصالحه و أفرح بيه و أسامحه و أعامله على إنه
قلبى ده طفل صغير
إياك تزعل منه
لو يوم فيه تتحير
سامح و أعرف إنه
طفل صغير و بيتغير طبعا غصب عنه
غصب عنه إكمنه ..طفل صغير قلبى
__________________________________
الأغنيه للطيفه من البومها الاخير
إتفضل الورقه و القلم
---------------------------------------
Tuesday, June 5, 2007
أنايا الأخرى
أنايا الأخرى
هذه الأنا التى تجعلنى أزهد فيما أملك و أطمع فيما لا أستطيع الحصول عليه
لو أستطيع فقط ان استئصلها من داخلى
فيبقى بداخلى الأنا الهادئه الراضيه المستكينه
لو أستطيع........
______________________________________________________________
لما تموت الكلمات على شفتى عندما أراك
أجدنى أتلعثم و أعبر بيدى بشكل بهلوانى عن أبسط الأشياء
أهرب بعينى بعيد عنك خوفا أن تبثك دواخل نفسى
تتدخل أنايا الاخرى قائله "لأنك عبيطه يا حبيبتى"
أنظر لها
أقول:ألا تركتينى أهيم للحظات؟؟أرجوكِ...دائما ما تفسدى على تأملاتى
هى:أوكى يا حلوه...مدام هنتأمل بقى يبقى تعالى نتأمل مع بعض منا رحت و لا جيت برضه نفسك و يهمنى سعادتك
أجدنى أشاهد منظر خارجى فيه أنا و هو نجلس معا فى مقهاى المفضل
لا يتكلم هو و إنما ينظر لى فقط
نعم إنها هى
إنه ينظر لى نفس نظرة "نيكولس كيدج" هذه النظره التى تشعرك انك الاولى و الاخيره ..
أن لا وجود لبنات حوا إلا من خلالك أنت
ها أنا ذا أقطم قطعة الجاتو و أجد بداخلها خاتم الخطبه
أعيش فى فيلم من أفلامى المفضله ...و الجميل أننى أنا البطله
.......
أفيق فى غرفتى و قد علت على شفتاى أبتسامه كبيره مع نظره هائمه هادئه
تتنهد أنايا الأخرى قائله:ياعينى عليكى يختى...فوقى شويه..إنتى فكره أن الخطوبه و البصه و الخاتم أخرة الحدوته
لا يا ماما
دى لسه هتحلوووووووووو
منظر داخلى
أنا و هو
و أنضم الينا ثلاثة أطفال إن صح الوصف
أجلس أنا على المقعد أخيط له قميصه الأزرق بينما يتخذنى ملائكتى الصغار وسيله للتسليه
...
فهذا يجذب شعرى و هذا يرسم على قدمى و الأخر يحيك بنطالى الذى أرتديه
الغريب أننى كالمغيبه لا أصيح و لا أقول لأحدهم توقف
فى عينى نظرتى الهائمه و لكنها أصبحت نظره مكسوره مغلوبه على أمرها
أدير نظرى فأجد الصاعقه
هو
و قد نما كرش له كما ينمو النبات الشيطانى و ذهب شعر رأسه فى رحله بلا عوده
يبدو أقصر قامه ..لا لا
أنفضى عن رأسك كل تلك الأفكار
ألم تعاهديه أن تحبيه فى الصحه و المرض
أن تتحملوا معا كل مصاعب الحياه
إنه هو
صاحب النظره السحريه مهما أختلف مظهره
يلتفت لى
و بكل نعومه يقول:انتى يا هاااااااااانم...انتى لسه بتخيطى القميص
ربنا ينتقم منك يللى فى بالى
انا ورايا شغل
طيب و الله منا لبسه
منا لو كنت اتجوزت ست بيت شاطره مكنش ده بقى حالى
ثم مالك فشولتى كده ليه
لازم تهتمى بمظهرك بقى شويه
حرام عليييييييييكم ..انتى مبتتفرجيش على الفيديو كليبببببببب
أريد أن أصيح من الخارج ألا تنظر إلى المرأه أيها ......
و لكن الغريب أن أنا التى بداخل الصوره لا تتحدث و لا تثير اى جلبه لما قاله كانها اعتادت عليه
تكسى عينها نظرتها و تصمت
فقط تصمت
______________________________________________________
فى غرفتى مره أخرى
لما؟؟؟
لما أصبحت أبدو هكذا
لقد ازداد وزنى كثيرا
ترد أنايا الاخرى: ده علشان خلفتيله 3 عيال يا ماما
عايزه يبقى شكلك ايه
ثم البيه اللى بيتكلم على الفيديو كليبس
مشافش مقايس الرجاله فيها و لا ايه؟؟؟؟؟
يا شيخه خلى الطابق مستور بلا نيله
رجاله......
أتدرين يا أنايا الأخرى
لو خير الانسان ما بين جهله بالمستقبل او كشف كل أسراره له لاختار الجهل
أنايا:ده الانسان الضعيف يا ماما..اللى خايف من اختيارته الغلط
أنا قلتلك قبل كده إحنا ملناش الا بعض
_______________________________________________________
لو أستطيع فقط أن استئصلها هذه الأنا الأخرى
Posted by big big girl...in a big big world ::
9:59 AM ::
2 comments:
إتفضل الورقه و القلم
---------------------------------------
Saturday, June 2, 2007
أسفلت قلبى
نفسى أنام جوه حضنك
مخفش شىء
أنام فى حضنك من غير كفن...أنام و أنا فاتحه درعاتى ليكى
أحضن حبات ترابك و تحضنينى
تتغلغلى فيا ..منا منك و ليكى تانى هعود فيوم
مش عايزه شىء غير ناى صغير و كمان
نعزف عليهم و ناجى ليلك
لسه يا أماه عندك مكان لبنتك جوه أرضك و لا خلاص؟؟
قلتيلى نفسى أضمك جوه حضنى يا بنت نيلى
سبينى أدور على حته جوه أرضى لسه ملكى
لسه فيها طينى و ريحتى
مش عايزه أضمك فى حضن أسفلت... لونه رمادى... ريحته موت
ضحكت ضحكه سخريه
عارفه يا أماه
أسفلت أرضك غزى كل قلوب و لادك
مستثمرين و مستعمرين دقوا على باب قلبى فيوم
قالوا هنحطلك شراين بلاستك
و قلبك خلاص هيبقى قوى
مهينجرحش و لا ينكسر أبدا فيوم
كل الناس يا حلوه سفلتوا خلاص قلوبهم و ركبوا الشراين البلاستك
و إنتى ليه لسه جوه قلبك طين و دم؟؟؟
متخفيش من الجروح اللى كانت
قبل ما نسفلت هيجى جراح كبير
نخيط الجروح منغير ألم
من النهارده إنتى أقوى..إنتى سعيده..إنتى هتبقى زى كل الناس
كانت جروحى يأماه سعتها ماليه حلقى بالمراره
كانت عيونى مدمعه
قلت خلاص و فيها إيه
مدام الكل سفلت طب مسفلت قلبى و أخلص من الألم
سبتهم يأماه يدخلوا جوه قلبى
بلدوزات و مدرعات
هدوا كل الذكريات حلوها و مرها
جابوا زفت أسود ملهلب فردوه فى قلبى
إنكوى المسكين و صرخ
كان يوم حزين
يوم محسيت إن خلاص أسفلت قلبى بقى طعم لحياتى
بقت مشاعرى لونه رمادى..برده..خامله
و فوسط حزنى لقيت مكان نسيوه هما يا أماه
لسه فيه ذكريات
لسه أرضه طين و دم
و لقيتك إنتى ذكرياتى
إنتى كل ما أمتلك
إنتى يا أماه
دورى يا غليا ليا
أكيد هتلاقي لبنتك مكان
جوه طينك فحضن أرضك
يمكن فيوم يأماه نكسر انا و انتى الأسفلت الرمادى
يختلط طينك بدمى
تتروى أرضك و قلبى
مستعده أرجع أنجرح و أنوجع...بس أرجع تانى أحس
******************************************
الصوره برضه من عند كريم
http://santakarim.blogspot.com
Posted by big big girl...in a big big world ::
5:55 AM ::
3 comments:
إتفضل الورقه و القلم
---------------------------------------
Name::big big girl...in a big big world
