لجل حظه الجميل اول نزول البيه كان فى ام الدنيا مصر
نزل و هو رافع راسه فوق مستنى يشوف بلالين ...صواريخ..اى حاجه
بس الجو ساكت هسسسسس
قال طب امشى فى الشوارع شويه... يمكن ....
نزل المسكين الشوارع
الشوارع زحمه خنقه
ناس بتكلكس و ناس بتشتم و ناس بتضرب بعض
محدش واخد باله منه كانه لا يرى
محدش حتى لابس طارطووورر
هو انا نزلت بدرى و لا ايه؟؟؟
سال فى نفسه
بص فى ساعته ال"سووتش الجامده" و لاقى التاريخ مظبوط 1\1\2007
امال فيه ايه يا جدعاااان ممم
يمكن حصلت مصيبه كونيه اليوم
او الاهلى اتغلب او اى حاجه
فالناس عفاريتها طالعه
انا اجدع شىء افكنى من ناس الشارع و اروح للناس فى بيوتها
البيوت السعيده
هروح الاقيهم مجتمعين حول تورتايه جميله بيحتفلوا بيا و بميلادى
و ممكن ينوبنى من الحب جانب بدل التحف اللى كانت بتتحفنا
بيها امنا الالفيه التانيه و كلنا مضطرين ناكل و نقول الله
المهم شد رحاله على بيت فى بولاق
و قال هو ده بيت القصييد
دخل البيت ..البيت فاضى
و فى اوض متافله
يمكن بيحتفلوه وراها؟؟
احتمال
دخل اول اوضه قبلته
لقى راجل و مراته قاعدين مع بعض
الراجل بيقلها :و احنا هنعمل ايه يا سعاد المرتب مبقاش
يكفى و العيال كل يوم ليهم طلب
قلتله مراته يا ابو احمد الدنيا بقت نااار ..ده حتى
الفول و الطعميه اللى يخويا بيقولوا عليهم اكل الغلابه
بيقولوا هيستوردوهم من بره نص سوه علشان فى اشاعت ان
الفول المصرى طلع مضروب و بيجيب الحمى الفوليه و العياذ بالله
و طبعا لما يستورد هيغلى اكتر و اكتر
يعنى حتى هو معدناش هنلاقيه
و التعليم المجانى بقى بفلوس
يأما دروس يأما الواد يسقط
و البيت حالته نيله و مع كل حمار ماشى فى الشارع بيتهز ده غير.....
صرخ فيها الراجل..اسكتى يا وليه كفايه مصايب هو باين عليها من اولها سنه زفتتت
و نزل القلم على وش اخونا 2007 زفتتت؟؟انا زفتت يا راجل انت
خساره فيكم زيارتى انت و مراتك الكوئبه انا الحق عليا انزل عندكم ليييه
بولاق؟؟ طب ما اروح الزمالك و لا المعادى الناس هناك بيقدروا و بيفهموا مش زييكم
و انطلق صاحينا نحو المهندسين
و نقى فيلا انيقه جدااااااااااااااااا بجنينه روعه و حركات
و قال بس هنا هلاقى مش تورته واحده لااااا 20 و احتمال
الاقى البتاع الصغير اللى اخواتى كانوا بيجوا من الارض مخزنينه فى جيوبهم ده " ساليزونات" و دخل 2007
الفيلا المره دى مش فاضيه فيه حركه بس حركه غريبه
ناس رايحه جايه بسرعه حتى مش بيبوصوا لبعض هو فيه ايه؟؟
طلع السلم و لاقى اوضه مفتوحه
و قف على الباب و لقى ام حضنه بنتها
يا بنتى احمدى ربنا و بطلى عياط بقى
الدكتور قال اننا لازم نبقى متماسكين قدام باباكى
يا ماما انا مش عارفه هعيش ازاى لو بابا حصله حاجه
انا من غيره هعيش ازاى؟؟
الام تحضن البنت اكتر
يبنتى كله بيعدى و كله بيهون بس انتى اتكلى على الله
2007 واقف على باب و دموعه على وشك الانهيياااار
البنت لمامتها مش عارفه يا ماما انا حاسه ان السنه دى سنه كئيبه و قلبى مقبوض منها مش عارفه ليه
2007 يصرخ انا كئيييبب ؟؟؟؟تصدقوا بالله ان خساره فيكم دموعى اظاهر ان انا بختار غلط انا مالى و مال البيوت و همومها مهما اللى فى البيوت اكيد قاعدين فيها من همهم
انا انزل للنوادى هناك هلاقى الشباب الحلو مهيصين و لابسين الطراطيييرررررررررر
قام المسكين ماشى لغاية نادى من النوادى " لانه مش معاه حق التاكسى" و دخل برجله اليمين
لقى لمت شباب قال هما دول و قام قاعد فى وسطهم
قال اولهم: مع بداية 2007 كده يعدموا صدام..حسبنا الله و نعم الوكيل ضاعت العراق خلاص ضيعوها بين شيعه و سنه و ابصر ايه انتهت قوى اسلاميه اخرى
قال الثانى:داخل علينا 2007 بتدهور فى الشارع الفلسطينى و لبنان اللى لسه بتحاول تلم جراحها و تعمير اراضيها تانى قبل ما تضرب من جديد..سوريا و ايران و تهديدات القوى العظمى الله ياخدها بمحيهم من الخريطه 2007 شكله عام مششاكل
واحد تالت " اشمعنى هو يعنى":يعنى يخويا انت و هو همكم على الجيران متبصوا لحلنا اللى بقى يصعب على اسمهم ايه دول مخدرات ماليه البلد ..بطاله متعدش...جرايم حاسب من الحسد...الحكومه خصخصت كل شىء لدرجة انهم بيبحثوا خطه جديده لخصخصة هدوم المواطنين علشان يخلوهم يستعدوا لموجة الحر اللى جايه بلدنا فيها كتير بس احنا بس اللى اتعودنا نضحك على همومنا
بنت قاعده فى الكورنر:يا ترى ايه ممكن يحصل فى 2007 اكتر وحشيه من اللى حصل فى 2006؟؟اطفال فى سن الورد بيتقتلوا و يتعذبوا لمجرد اننهم اطفال شوارع اكلنا بقى غلط و شربنا غلط معدش فى شىء مش فيه نواه لزرع السرطان فى اجسدنا و اجساد اطفالنا 2006 عدى و قتلوا فينا الامل 2007 جه لشعب جثه هامده لو مكانه اخد التاكسى اللى جبنى و ارجع لبيت ابويا....
انطلق 2007 فى الشوارع بيتمتطوح هو فيه ايه يا جدععااااااان البلد حاله انقلب ليه حتى الشباب بقوا مليانين كئابه طب اروح فين منا مش هرجع فوق نار الارض اهون من نار الست الالفيه التانيه
انا احوال اخر محاوله الشباب اللى رحتلهم دول ناس فايقه و رخمه انا اشفلى اى ديسكو تك او غرزه و اروح معاهم هما دول الناس بتاعوت الححظ
مشى صاحبنا فى الشارع متتبع رائحة الحشيش لغاية ما وصل لغرزه اوريجينال خالص و لقى واحد قاعد عمال يضحككك يضححك قال بس هو ده حد مبسوط اهه قرب منه و لاول مره من ساعة نزوله الارض حد يشعر بيه ده حتى قاله هابى نيو ييير يا ماان صاحبنا مكدبش خبر و قام قاعد قاله بجد؟؟ بجد انت حاسس ان دى هابى نيو ييير؟؟ يعنى 2007 هابببى؟ بصله الراجل بربع عين " اللى قادر يفتحها" انت بقى هتفوقنى ليييه صحيح الحشيش غلى و صحيح البانجو شح من السوق بس هى هابى هابى امال ايه بيقولوا بلاد بره معدتش هتبعتلنا مخدرات خلاص الشعب اتككييف بما فيه الكفايه معدناش محتاجين و ضحك صاحبنا ضحكه طويله انتهت ببكاء اشبه بالعويل هابى امال ايه هابى على اهل مشفتهمش..و علم متعلمتوش...و دنيا معشتهاش..حتى الاخره ضيعتها و مش عايزه تبقى هابى دى هابى و نص عارف هابى ليه لانى مش هعيش فيها بعد كده خلاص هسيب 2007 قبل ما تسبنى و ام راميله السيجاره و قايم جرى على النيل و رمى نفسه
طبعا كلنا متخيلين وش 2007 الان عينه مبرقه و جاله شلل لحظى فكر شويه و قام مطلع موبايله و قال مبدهاش انا هكلم ماما بقى و اللى يحصل يحصل الوووو ماما الحقييينى
الالفيه التانيه:ا2007 مالك فيه ااايه؟؟انت لحقت علشان الحقك؟؟؟
2007:يا ماما العيشه مع اهل الارض مستحيييلله دول بيكرههونى ...بيشتمونى كده عينى عينك..معدش فى احترام يا ماما خلاص..ثم الظروف هنا وحشه اوىىى و الشقق الايجار الجديد غاليه عليا و مش عارف هبات فين..
الالفيه:بقلك يا واد انت ..انت عايز تشمت فينا خالاتك 1000 و 3000 عايزهم يقولوا انى مخلفتش رجاله عايزهم يقولوا ان انا عيالى مش قادرين على 365 يوم اجمد كده احسننللكو اييياااااك
هنا اتقطع الخط لان كرت المحروس 2007 خلص " مع انه لسه شاحن بخمسين جنيه" و طبعا بعد كلام الام و الكردت بتاعه اللى خلص ملقاش 2007 حل غير انه يشرب السيجاره و يعمل دماغ و يفكر ازاى ينتقم من البنى ادميييين مبروك علينا سنه دماغها عاللليه
_____________________________________________ احم احم اعتذر عن الكئابه بس هى فكره راودتنى و مقدرتش اتجاهلها 2006 الحمد لله على كل ما حدث به حلوه و مره 2007 اشعر نحوه بتفاؤل غريب اتمنى ان يدوم الحمد لله
Posted by big big girl...in a big big world ::
12:14 PM ::
4 comments:
Name::big big girl...in a big big world
