ورقه و قلم

علشانك يا بلدي !!!!

علشانك يا بلدي .. بنحبك يا بلدي

ونضحي بأروحنا فدا ترابك يا بلدي

سيبك انت من الكلام الكبير ده .. انت هتضحك علي مين

بلدي ايه وكلام فاضي ايه

بتحبها علي ايه يا موكوس

وهتضحي بروحك كمان .. بيتهيألي وسعت منك شويه دي !!

عملتلك ايه بلدك اللي فرحان بيها دي

ما تشوف حالك عامل ازاي

عاطل - جاهل ولو كنت جامعي - عاله علي اهلك - فاشل غصب عنك

بيتاكل حقك كل يوم - مذلول للي يسوي واللي ميسواش

مش دا حالك في بلدك اللي بتحبها

بتحبها ليه بقي ؟

أنا أقولك

جربت تعيش بعيد عنها ؟

طيب جرب

هتعرف يعني ايه مصر

لما تصحي الصبح تخرج من بيتك متلاقيش شمس مصر بتدفيك

هتعرف يعني ايه مصر

لما متلاقيش وش بسيط بيبتسملك وهو لا يعرف ولا يقربلك

هتعرف يعني ايه مصر

لما متلاقيش اللي بيرمي عليك السلام أو بيصبح عليك

صباح الفل .. صباح العسل .. عامل ايه .. الحمد لله رضا .. ربنا يرزقك ويسهل لك

هتعرف يعني ايه مصر

لما تاكل أحلي وأغلي أكل بس متبقاش مبسوط ولا مستطعم وتدور علي أكل مصري

هتعرف يعني ايه مصر

لما متلاقيش اللقمه بسيطه وهنيه بين اهلك وناسك وحبايبك

هتعرف يعني ايه مصر

لماتفتح الحنفيه وانت عطشان ومتقدرش تشرب

هتعرف يعني ايه مصر

لما تلاقي الوشوش غير الوشوش .. والناس غير الناس

لما ماتشوفش الناس حواليك زحمه ودوشه .. متقوليش دي تبقي مصلحه

والله بالعكس .. الزحمه دي نعمه تحمد عليها ربنا ميعرفهاش اللي اللي بعد عن مصر

أصل هي دي مصر

المصريين هما مصر .. أحسن ناس .. أجدع ناس

مهما حصلك فيها

مهما عملت فيك

مهما اتظلمت

مهما تعبت

برضه مصر دي امك

لو عملت فيك ايه برضه بتحبك

مهما عملت معاك ولو ظلمتك

ولو ضربتك بالقلم

هتلاقي نفسك غصب عنك بتوطي علي ايدها وتبوسها

Posted by MR. Mind :: 12:43 PM :: 3 comments:

---------------------------------------